У Валожынскім раёне іх можна будзе набыць практычна ва ўсіх лясніцтвах, а таксама на ёлачным кірмашы на вуліцы Партызанская, 4 (стаянка для аўтамабіляў).
— Для папулярызацыі сярод насельніцтва беражлівых адносін да лясных рэсурсаў, з 20 снежня па 31 снежня ў нашым лясгасе, як і ва ўсёй краіне, праходзіць акцыя «Захавай сімвал свята», — расказваюць ва ўстанове. - Падчас продажаў галоўнага атрыбуту свята будзем прапаноўваць жыхарам горада, а таксама яго гасцям яшчэ і дрэвы ў кадках, якія можна захаваць да вясны, а потым высадзіць дома, на лецішчы, або ў бліжэйшым лясніцтве падчас «Тыдня лесу».
Кожнаму пакупніку, што аддасць перавагу ноў-хаў, будзе ўручана памятка па доглядзе навагодняга дрэва, дзе спецыялісты рэкамендуюць паліваць яго, але пры гэтым не захапляцца, каб не «прачнулася» раней часу, а таксама апырскваць вадой, паварочваць для лепшага асвятлення вакол восі. . Ну і, вядома ж, іглічнае дрэва не можа стаць пакаёвай раслінай. Таму з надыходам вясны яго трэба будзе перасадзіць у грунт.
З мэтай экалагічнага выхавання падрастаючага пакалення падчас акцыі "Захавай сімвал свята", Валожынскі лясгас арганізуе яшчэ і перадачу навагодніх дрэў (на бязвыплатнай аснове) установам адукацыі, размешчаным на тэрыторыі раёна. Няхай растуць і цешаць дзяцей!
