Здымачная група праекта "Навіны культуры" наведае асноўныя пляцоўкі свята і пакажа ўсе сюрпрызы і тэматычныя праекты, падрыхтаваныя арганізатарамі для жыхароў і гасцей Маладзечна ў юбілейны (мерапрыемства праводзіцца 20-ы раз) для фестывалю год, а спецыяльны суботні выпуск праграмы "Культурны рэпартаж" пагартае старонкі ўсёй дваццацігадовай гісторыі музычна-паэтычнага форуму.
Галоўнай падзеяй першага фестывальнага дня стануць урачыстая цырымонія адкрыцця і ўзнагароджання лаўрэатаў Нацыянальнага конкурсу маладых выканаўцаў беларускай эстраднай песні, прэм'ерная канцэртная праграма "Талака", прысвечаная памяці класіка беларускай літаратуры Уладзіміра Караткевіча і знакамітага піяніста і аўтара песень Ігара Паліводы. Канцэртную праграму прадставяць салісты Нацыянальнага акадэмічнага канцэртнага аркестра пад кіраўніцтвам народнага артыста Беларусі прафесара Міхаіла Фінберга.
Тэлеверсію канцэрта-адкрыцця фестывалю тэлеканал "Беларусь 3" пакажа 12 чэрвеня ў 17.20, а вечарам у 21.30 у прамым эфіры з Летняга амфітэатра Маладзечна - святочны гала-канцэрт закрыцця форуму, праграму "Маладзечна - насустрач шлягерам" з удзелам зорак беларускай эстрады і любімых ансамбляў.
