Закон у тым ліку прадугледжвае павелічэнне з 5 да 10 сутак тэрміну, на працягу якога іншаземцы, якія прыбылі ў Беларусь, абавязаны зарэгістравацца па месцы фактычнага часовага знаходжання. Такое рашэнне прынята для развіцця турыстычнай і інвестыцыйнай прывабнасці краіны, спрашчэння дзелавых і прыватных кантактаў.
У цэлым дакумент накіраваны на ўдасканаленне шэрага прававых норм. У мэтах забеспячэння максімальнай абароны інтарэсаў грамадства і дзяржавы ад пагроз рознага характару карэкціруюцца падставы адмовы іншаземцу ў выдачы візы для ўезду ў Беларусь або ва ўездзе ў краіну. Адначасова вызначаецца механізм атрымання іншаземцамі і іх прадстаўнікамі інфармацыі аб уключэнні ў спіс асоб, уезд якіх у Беларусь забаронены або непажаданы.
Знамянальна, што гэта тэма ўзнімалася і ў час нядаўняй сустрэчы кіраўніка дзяржавы са студэнтамі і выкладчыкамі медыцынскіх ВНУ. Тады адзін з замежных студэнтаў звярнуўся з просьбай павялічыць час рэгістрацыі для замежных гасцей пасля прыбыцця ў Беларусь. Аляксандр Лукашэнка адзначыў, што пытанне аб прадаўжэнні тэрміну рэгістрацыі з 5 да 10 дзён ужо абмяркоўвалася. "Гэту праблему, калі яна яшчэ не вырашана, мы вырашым", - сказаў ён.
