Аграпрамысловы комплекс Міншчыны — устойлівая галіна эканомікі, хоць і не простая. Яна з’яўляецца, у тым ліку, лакаматывам для іншых галін. Аб гэтым сказаў старшыня Мінаблвыканкама падчас ушаноўвання пераможцаў абласнога спаборніцтва за дасягненне высокіх паказчыкаў у развіцці АПК.
— Прэзідэнт не раз гаварыў, што трэба глядзець на вытворчасць прадукцыі, не зусім традыцыйнай у нашым разуменні. Гэта значыць, не толькі малако, свініна, ялавічына, — адзначыў Аляксандр Турчын.
Цэнтральны рэгіён рэкамендацыі кіраўніка дзяржавы прыняў да ўвагі. Сёлета ў вобласці ўжо практычна рэалізавалі два праекты.
— Я лічу, гэта знакавыя праекты для нашай краіны. Найперш, перапёлчына ферма Салігорскай птушкафабрыкі. Вялікае прадпрыемства, найбуйнейшае на прасторах былога Савецкага Саюза, якое будзе забяспечваць вялікія аб’ёмы вытворчасці перапёлчыны яйкі. Гэта ніша, у якой птушкафабрыка будзе з’яўляцца манапалістам.
Другі праект — «Агракамбінат Дзяржынскі» у Капыльскім раёне, які спецыялізуецца на вытворчасці мяса індычкі.
— Мы бачым па спажыванні мяса на душу насельніцтва, што Расея больш, чым у два з лішнім разы апярэджвае Беларусь, не кажучы ўжо пра Польшчу, ад якой таксама адстаем. Таму вытворчасць мяса індычкі — зноў жа тая ніша, якая дазваляе з упэўненасцю глядзець у будучыню. І прадукцыя, якую мы пачалі вырабляць, будзе запатрабавана. Бо гэта, у тым ліку, здаровае харчаванне, што немалаважна для нашых людзей.
Ёсць маштабныя планы і ў галіне раслінаводства, жывёлагадоўлі.
— У галіне малочнай жывёлагадоўлі мы ўжо не першы год рухаемся па намечанай стратэгіі будаўніцтва новых малочнатаварных комплексаў. Гэта тыя даручэнні, якія даваў Прэзідэнт. І мы бачым, на які вынік павінны выйсці праз пэўны прамежак часу.
Мадэрнізацыя закране і галіну свінагадоўлі.
— Частка пагалоўя стаіць на сучасных свінакомплексах. А частка, на жаль, на старых, якім больш за 30-40 гадоў. Задача: у бліжэйшую пяцігодку трэба паставіць усё пагалоўе свіней у сучасныя комплексы. Гэта не проста даніна модзе — гэта магчымасць атрымаць неабходныя фінансавыя вынікі для эканамічна эфектыўнай працы гэтай галіны, — падкрэсліў Аляксандр Турчын.
У цэлым, у сельскую гаспадарку ўкладваецца каласальны аб’ём інвестыцый. Гэта, паводле слоў губернатара, дае свой вынік.
— І што мяне не можа не цешыць: гэты вынік трансфармуецца ва ўзровень заработнай платы працаўнікоў. Кожны год ідзе сур’ёзны дадатак. Гэта аб’ектыўная неабходнасць. З іншага боку, каб плаціць добры заробак, павінна быць эфектыўная праца аграпрамысловага комплексу. Плаціць трэба тыя грошы, якія мы зарабілі.
Нямала маштабных праектаў рэалізуецца па малочнай і мясной перапрацоўцы, адзначыў кіраўнік Міншчыны.
— Запланаваны цікавыя праекты, якіх яшчэ не было ў нашай краіне. Гэта і вытворчасць лактаферыну на Слуцкім сыраробным заводзе, і іншыя праекты, якія дазволяць нам атрымліваць дадатковую выручку, дадатковы прыбытак з малака, мяса. У выніку гэта ўсё гарантуе харчовую бяспеку нашай краіны, паступленне валютнай выручкі. І, самае галоўнае, дае эфектыўныя і высокааплатныя працоўныя месцы ўнутры краіны.
