У склад расійскай дэлегацыі ўвайшлі спецыялісты Тэхнічнай і Карпаратыўнай акадэмій "Расатама", супрацоўнікі канцэрна "Расэнергаатам". Яны азнаёміліся з матэрыяльнай базай вучэбна-трэніровачнага цэнтра Беларускай АЭС: поўнамаштабным трэнажорам цэнтральнага пульта кіравання і кабінетамі падрыхтоўкі аператыўнага персаналу з лакальнымі трэнажорамі розных сістэм. Бакі разгледзелі магчымасці далейшага супрацоўніцтва ў галіне падрыхтоўкі кадраў і абмену вопытам інструктарскага персаналу.
Абмеркаванне пытанняў развіцця кадравага патэнцыялу ў інтарэсах атамнай галіны было прадоўжана на нарадзе ў Міністэрстве энергетыкі. У рабочай сустрэчы прынялі ўдзел кіраўнікі міністэрства, кіруючай кампаніі "Белэнерга", БелАЭС, вядучых беларускіх ВНУ. Намеснік міністра энергетыкі Беларусі Міхаіл Міхадзюк падзякаваў прадстаўнікам расійскага боку за падтрымку ў пытаннях развіцця атамнай энергетыкі краіны і супрацоўніцтва па шырокім коле напрамкаў у гэтай сферы. "На гэтым этапе адным з ключавых пытанняў бяспечнай работы атамнай станцыі з'яўляецца своечасовая і якасная падрыхтоўка нацыянальных кадраў, фарміраванне стратэгіі развіцця кадравага патэнцыялу атамнай энергетыкі. У сувязі з гэтым расійскі вопыт для нас вельмі значны. Разлічваем на падтрымку і супрацоўніцтва ў рэалізацыі такой важнай задачы", - сказаў ён.
З экасістэмай развіцця кадравага патэнцыялу расійскай атамнай галіны ўдзельнікаў нарады азнаёміла генеральны дырэктар Карпаратыўнай акадэміі "Расатама" Юлія Ужакіна. "У "Расатаме" сфарміравана асаблівая філасофія развіцця талентаў, якая заключаецца ў стварэнні цэлай экасістэмы. Мы будуем такую сістэму, у якую таленавіты чалавек захоча прыйсці сам і ў якой ён зможа раскрыць усе свае таленты. У "Расатаме" дзейнічае комплексны падыход на ўсіх этапах: ад ранняй прафарыентацыі школьнікаў і падрыхтоўкі кадраў у каледжах і ўніверсітэтах да бесперапыннага развіцця дзеючых супрацоўнікаў і работы з суперпрафесіяналамі пенсійнага ўзросту", - адзначыла яна.
Паводле слоў Юліі Ужакінай, для навучання лідараў "Расатама" рэалізуецца маштабная комплексная праграма развіцця кіраўніцкага кадравага рэзерву. У яе ўбудаваны модулі, прысвечаныя стратэгічнаму мысленню, маркетынгу, лідарству, кіраванню камандамі і змяненнямі. Колькасць удзельнікаў, якія ўвайшлі ў склад кіраўніцкага кадравага рэзерву з моманту яго фарміравання, склала каля 6 тыс. Кожны год у праграму прыходзяць па 1 тыс. новых кіраўнікоў.
Інфармацыю аб вопыце падрыхтоўкі персаналу аб'ектаў выкарыстання атамнай энергіі для галіны, у тым ліку па праектах будаўніцтва і эксплуатацыі атамных станцый за мяжой, прадставілі спецыялісты Тэхнічнай акадэміі "Расатама". "У Тэхнічнай акадэміі набыты значны вопыт і кампетэнцыі ў сферы падрыхтоўкі персаналу замежных АЭС. Цяпер сіламі супрацоўнікаў акадэміі ажыццяўляецца падрыхтоўка персаналу для АЭС "Рупур" (Бангладэш), АЭС "Акую" (Турцыя), АЭС "Эль-Дабаа" (Егіпет). Пачынаючы з 2018 года мы цесна супрацоўнічаем з беларускімі партнёрамі ў сферы падрыхтоўкі персаналу Беларускай АЭС. Цяпер падрыхтавана больш за 800 спецыялістаў па ключавых напрамках эксплуатацыі атамнай станцыі", - падкрэсліў рэктар Тэхнічнай акадэміі Юрый Селязнёў.
Кіраўнік расійскай дэлегацыі, дырэктар дэпартамента падрыхтоўкі персаналу канцэрна "Расэнергаатом" Рыгор Хахулін падтрымаў прапановы беларускіх калег у частцы пастаноўкі сістэмы падрыхтоўкі кадраў Беларускай АЭС на базе вучэбна-трэніровачнага цэнтра. "Для фарміравання збалансаванай сістэмы і праграм падрыхтоўкі аператыўнага персаналу і кіруючых пасад мэтазгодна папярэдне правесці аналіз магчымасцей і дакументацыі станцыі з мэтай выпрацоўкі рэкамендацый. У сувязі з гэтым падтрымліваю ідэю з правядзеннем партнёрскага аўдыту і, зыходзячы з яго вынікаў, вызначэння першачарговых крокаў і падыходаў да далейшай работы па фарміраванні сістэмнага падыходу да навучання. У гэтай частцы ў канцэрна ёсць вялікі вопыт і мы гатовы вельмі аператыўна ўключыцца ў такую работу", - сказаў ён.
Па выніках нарады прынята рашэнне аб фарміраванні сумеснай каардынацыйнай групы для рэалізацыі намечаных задач.
