Пасяджэнне праходзіла на базе Нацыянальнага акадэмічнага тэатра імя Янкі Купалы.
"На званне культурнай сталіцы 2023 года прэтэндавалі шэсць гарадоў: Баранавічы Брэсцкай вобласці, Мазыр Гомельскай вобласці, Свіслач і Шчучын Гродзенскай вобласці, Слуцк Мінскай вобласці, Бялынічы Магілёўскай вобласці. Гарады прэзентавалі свае магчымасці, прычым некаторыя рэгіёны прыехалі ў Мінск са сваімі канцэртнымі нумарамі. Па выніках галасавання членаў калегіі міністэрства культурнай сталіцай Беларусі ў 2023 годзе стане Слуцк", - адзначылі ў прэс-службе.
Падчас прэзентацыі гарадоў-прэтэндэнтаў ацэньваўся станоўчы вопыт арганізацыі і правядзення культурных мерапрыемстваў, наяўнасць развітой сацыяльна-культурнай інфраструктуры, сістэмнасць работы па захаванні матэрыяльных і нематэрыяльных гісторыка-культурных каштоўнасцей, захаванне традыцый, звычаяў, фестываляў народнай творчасці, наяўнасць новых культурных праектаў, запланаваных для рэалізацыі ў рамках рэспубліканскай акцыі "Культурная сталіца года".
У перапынку паміж прэзентацыяй гарадоў сваёй творчасцю радавалі прысутных артысты Маладзёжнага тэатра эстрады. На сцэну Купалаўскага таксама выйшаў пераможца нацыянальнага адборачнага тура XX Міжнароднага дзіцячага музычнага конкурсу "Віцебск" Елісей Касіч.
Рэспубліканская акцыя "Культурная сталіца Беларусі" праводзіцца з 2010 года. Яе мэтай з'яўляецца папулярызацыя дасягненняў нацыянальнай культуры, прэзентацыя самабытнасці гарадоў і рэгіёнаў, іх турыстычнай прывабнасці. Культурнай сталіцай у гэтым годзе стаў горад Орша.
