«З кожным годам рака часу ўсё далей выносіць нас ад святога і памятнага дня 9 мая 1945 года. Але нетленно веліч подзвігу нашага народа. Зямля гарэла пад нагамі лютага ворага. Кожны дзень Вялікай Айчыннай вайны на фронце і ў тыле ворага – гэта прыклады бязмежнай мужнасці і стойкасці савецкіх людзей, вернасці Радзіме», – такімі кранальнымі словамі быў пачаты мітынг у аграгарадку Хацюхова.
Ля брацкай магілы сабраліся школьнікі і настаўнікі мясцовай сярэдняй школы, прадстаўнікі сельскага выканаўчага камітэта.
- Мы схіляем галовы і гаворым словы падзякі людзям, якія падарылі нам мірнае жыццё – адзначыла кіраўнік спраў Хацюхоўскага сельвыканкама Вольга Ралейна. - Блакітным небам над галавой, шчаслівым дзяцінствам мы абавязаны тым, хто з сорак першага па сорак пяты, не шкадуючы свайго жыцця, мужна абараняў Радзіму.
Удзельнікі мітынгу ўшанавалі памяць воінаў хвілінай маўчання.
- Пад тысячай абеліскаў па ўсёй беларускай зямлі вечным сном спяць мільёны тых, хто не вярнуўся з вайны. І пакуль б'юцца нашы сэрцы, мы не маем права забыцца пра іх подзвіг, – сказаў у сваім выступленні дырэктар школы Уладзімір Рогаў. – Тая жменя зямлі, якую мы возьмем сёння з гэтага памятнага месца, будзе змешчана ў спецыяльную капсулу разам з зямлёй з іншых месцаў, дзе пахаваны загінуўшыя ў баях з нямецка-фашысцкімі захопнікамі на тэрыторыі Крупскага раёна. А затым будзе перададзена на захоўванне ў крыпту Храма-Помніка ў гонар Усіх Святых у Мінску.
Ва ўрачыстай абстаноўцы і ў абсалютнай цішыні з брацкай магілы была ўзята зямля і змешчана ў спецыяльны мяшочак. Да помніка ляглі кветкі.
Сімвалічна, што мітынг адбыўся напярэдадні Дня Канстытуцыі. У Хацюхоўскай сярэдняй школе да гэтай падзеі 14 юнакоў і дзяўчат атрымалі пашпарты, двое з іх - на раённай імпрэзе. З прывітальным словам да прысутных звярнуўся Уладзімір Рогаў, ён уручыў старшакласнікам падарункавыя камплекты выдання «Я - грамадзянін Рэспублікі Беларусь».
Мітынг прайшоў вельмі кранальна. Было відаць, што ўсё, што адбываецца глыбока хвалюе і дарослых, і моладзь, што блізка да сэрца прымаюць значэнне самога мерапрыемства, значэнне таго подзвігу, які ажыццявілі салдаты той вайны для нас, сваіх нашчадкаў. А гэта значыць, што памяць будзе жыць і перадавацца наступным пакаленням.
