1 верасня - асаблівы дзень. Гэта не проста пачатак новага навучальнага года, а сімвал пераемнасці пакаленняў, дабра, ведаў і памяці.
Святочны настрой, музыка, кветкі, банты…
На ўрачыстых лінейках ва ўстановах адукацыі рэгіёну сабраліся навучэнцы і іх бацькі, запрошаныя госці, ветэраны педагагічнай працы, кіраўнікі арганізацый, адміністрацыі і педагагічныя калектывы школ.
З прывітальным словам і віншаваннем да педагогаў, навучэнцаў і бацькоў у Крупскай раённай гімназіі звярнуўся старшыня Крупскага райвыканкама Вячаслаў Лапатка:
– Першае верасня – яркае і ўрачыстае свята, якое дарагое ўсім пакаленням грамадзян нашай краіны. У першую чаргу сёння свята для першакласнікаў. Першы школьны званок адкрые вам дарогу ў захапляльны свет ведаў. Наперадзе ў вас цудоўны час. Час цікавых сустрэч і незабыўных уражанняў. Важным і вызначальным у выбары прафесіі будзе сёлетні навучальны год і для выпускнікоў. Толькі ўпартай працай, стараннямі можна дабіцца пастаўленых задач. Шлях чалавека ў вялікае жыццё пачынаецца са школьнай лавы, дзе фармуюцца яго характар і светапогляд, адбываецца станаўленне асобы. Які будзе гэты шлях, залежыць ад настаўнікаў. Прафесіяналізм, любоў да дзяцей і актыўная грамадзянская пазіцыя кожнага з вас, паважаныя педагогі, заслугоўвае вялікай падзякі і павагі. Адказная роля ў выхаванні дзяцей належыць і бацькам. Толькі сумеснымі намаганнямі можна выхаваць дастойных грамадзян Беларусі, якія будуць жыць і працаваць на карысць краіны.
Віншаванні і наказы былі адрасаваны прысутным ад начальніка ўпраўлення па адукацыі, спорце і турызме райвыканкама Таццяны Сцібікінай, дырэктара гімназіі Ірыны Шамашовай, ад бацькоў першакласнікаў.
Сімвалічна прадставілі на лінейцы ўзаемасувязь дзяржавы, сям'і і ўстановы адукацыі як аспекту фарміравання асобы і светапогляду. «Радзіма - гэта месца, дзе б'ецца тваё сэрца, дзе жывуць твае карані. Сям'я - гэта месца, дзе закладваюцца асновы любові да Радзімы, павагі да традыцый і культуры. Гімназія - гэта месца, дзе мары знаходзяць крылы. Няхай памяць аб подзвігу нашых продкаў заўсёды будзе для нас крыніцай сілы і натхнення», – казалі ў выступе хлопцы.
У гэты дзень ва ўсіх агульнаадукацыйных установах раёна адбыўся першы ўрок пад назвай «Эстафета пакаленняў: захоўваючы мінулае, ствараем будучыню». Урок аб важнасці гістарычнай памяці, нацыянальных традыцый і духоўнай спадчыны. Праз дыялог пакаленняў навучэнцы адчуваюць сваю сувязь з мінулым і ўсведамляюць адказнасць за будучыню сваёй Радзімы.
