Новы год - самае добрае і выдатнае свята, горача каханае як дзецьмі, так і дарослымі. Ёлкі, падарункі, мішура, салюты… Аднак работнікам міністэрства па надзвычайных сітуацыях добра вядома, што менавіта гэты перыяд характарызуецца высокай рызыкай пажараў і НС, звязаных з піратэхнікай. Каб не дапусціць такіх здарэнняў, крупскія ратавальнікі актыўна праводзілі тлумачальную работу з насельніцтвам у месцах з масавым знаходжаннем людзей.
У краме «ФіксПрайс» была арганізавана праца інтэрактыўных навучальных пляцовак. Асаблівая ўвага пакупнікоў была звернута на піратэхнічныя вырабы, без якіх не праходзіць ніводнае свята.
- Набываць піратэхніку варта толькі ў спецыялізаваных аддзелах магазінаў, - падкрэслівала Наталля Сярговіч. - Звяртайце ўвагу на тэрмін захоўвання, наяўнасць інструкцыі на беларускай або рускай мове. Разгледзьце пакаванне і сам выраб: дэфектаў быць не павінна, кнот залеплены ці схаваны пад абгортку. Перш чым запускаць, абавязкова прачытайце інструкцыю яшчэ раз, таму што ў кожнага выраба свае асаблівасці, будзьце ўважлівыя.
Дзецям былі прапанаваны гульні «Крыжыкі-нулікі», «Знайдзі пару», «Знайдзі 5 аднолькавых карцінак», «Разгадай рэбусы», «Крокі выратавання». Кожны з рук ратавальнікаў атрымаў карысныя падарункі.
Падчас працы ёлачных кірмашоў акцэнт на правілы бяспечнай усталёўкі елкі, выкарыстанні гірлянд і іншай ілюмінацыі. Інспектар звяртала ўвагу на наяўнасць і спраўнасць аўтаномнага пажарнага апавяшчальніка і нагадвала алгарытм дзеяння ў выпадку пажару.
Самымі яркімі былі сустрэчы з дзятвой у Рэзідэнцыі Дзеда Мароза. Яшчэ да пачатку казачнага прадстаўлення інспектар прапаганды нагадвала хлапчукам і дзяўчынкам правілы бяспечных паводзін на канікулах і ў навагоднія святы. З радасцю дзятва разгадвала загадкі, адказвала на каверзныя пытанні інспектара, за што і атрымлівала падарункі. Падчас "урока бяспекі" было засвоена галоўнае:
– петарды і хлапушкі – дзецям не цацкі;
– бенгальскія агні – крыніца бяды;
– на лёд выходзіць небяспечна;
– пры пажары не хавацца і выклікаць ратавальнікаў па нумары «112».
Паважаныя грамадзяне! Ратавальнікі нагадваюць: святы працягваюцца, наперадзе Каляды. Давайце будзем асцярожныя! Не пакідайце дзяцей без нагляду! Беражыце сябе і сваіх блізкіх!
