"Пытанні выканання арганізацыямі ўмоў аказання дзяржпадтрымкі і выканання імі зацверджаных графікаў пагашэння запазычанасці знаходзяцца на кантролі і штомесяц разглядаюцца ва ўрадзе. Разам з тым ёсць шэраг праблемных пытанняў: назіраецца спад аб'ёмаў экспарту шкла і цэменту, не забяспечваецца поўная загрузка вытворчых магутнасцей, выкарыстоўваюцца неабгрунтаваныя пасрэдніцкія схемы пры рэалізацыі прадукцыі, а таксама пры закупках сыравіны і матэрыялаў", - адзначыў Сяргей Румас.

Сёння ва ўрадзе абмяркоўваюцца пытанні, звязаныя з выкананнем даручэнняў кіраўніка дзяржавы па павышэнні эфектыўнасці работы ў цэментнай і шкляной прамысловасці. Для стабілізацыі работы цэментных заводаў і ААТ "Гомельшкло" Прэзідэнтам прыняты рашэнні аб правядзенні рэструктурызацыі запазычанасці гэтых арганізацый перад рэспубліканскімі арганізацыямі, газазабеспячальнымі арганізацыямі і банкамі.

На існуючыя праблемы ў арганізацыях цэментнай прамысловасці звярнуў увагу і Камітэт дзяржкантролю. Ён прапанаваў устараніць выяўленыя недахопы і прыцягнуць да адказнасці вінаватых службовых асоб міністэрстваў, выканкамаў і арганізацый.

Паводле слоў Сяргея Румаса, пільнай увагі патрабуе складаная сітуацыя на шклозаводзе "Нёман". "Сфарміраваная раней крэдытная нагрузка, а таксама запазычанасць перад рэспубліканскім бюджэтам і за паліўна-энергетычныя рэсурсы істотна ўплывае на работу прадпрыемства. Пры гадавой выручцы ад рэалізацыі прадукцыі каля Br40 млн цяпер агульная сума даўгоў складае Br200 млн", - канстатаваў прэм'ер-міністр.

"Сёння мы павінны прааналізаваць праблемныя пытанні, уключаючы тыя, на якія паказаў Камітэт дзяржкантролю, і прыняць па іх неабходныя рашэнні", - рэзюмаваў кіраўнік урада.