У Крупскім гісторыка-краязнаўчым музеі прадстаўлены асабістыя рэчы касманаўта - лётны скафандр, трэніровачны касцюм, у якім Уладзімір Васільевіч быў у космасе. А таксама кнігі, копіі дакументаў, касмічнае харчаванне ў цюбіках, фатаграфіі, аўтарскія пасведчанні аб касмічных адкрыццях…

І вось адно з іх:

– Аднойчы з космасу Уладзімір Кавалёнак убачыў савецкую рыбную флатылію, – расказвае навуковы супрацоўнік музея Анастасія Гайдук. - У квадраце, дзе яна знаходзілася, рыбнай актыўнасці не назіралася. Затое яна была ў іншым месцы. І тады наш касманаўт звязаўся з цэнтрам: «Такісцi квадрат, вось такая шырыня, вось такая даўгата - перадыслакаваць флатылію ў зададзеную кропку». Гэта стала адкрыццём, што космас, аказваецца, можа дапамагаць народнай гаспадарцы. Можна Кавалёнка назваць першаадкрывальнікам у гэтай даследчай вобласці.

Нядаўна экспазіцыя папоўнілася макетам Сонечнай сістэмы.

- Мы распрацавалі цыкл заняткаў для школьнікаў пра жыццё і палёты ў космас Уладзіміра Кавалёнка, - працягвае Анастасія. – Пры дапамозе мультымедыйнай усталёўкі паказваем фільмы. Вось набылі «Сонечную сістэму». Выкарыстоўваем яе ў якасці навочнага дапаможніка. Дзецям цікава слухаць і глядзець, як рухаюцца планеты вакол сваёй восі і Сонца. У мінулым годзе экспазіцыя цэлы месяц знаходзілася ў музеі горада Жодзіна. Па словах калег, карысталася вялікай папулярнасцю і поспехам - жодзінцы з задавальненнем наведвалі выставу.