Каманда Крупскага раёна ўжо больш за 15 гадоў з'яўляецца штогадовым удзельнікам гэтага спартыўна-масавага мерапрыемства. Сёлета гэты фестываль сабраў больш за 400 удзельнікаў з усіх куткоў Беларусі ва ўзросце ад 4 да 69 гадоў, кожны з якіх спаборнічаў у сваіх узроставых групах і пераадольваў пасільную яму дыстанцыю.

На фота: каманда Крупскага раёна - спартсмены-навучэнцы і трэнеры Ахціенка Наталля Валянцінаўна (злева), Варановіч Ілля Уладзіміравіч (справа) аддзялення лёгкай атлетыкі Крупскай ДЮСШ.

І гэты фестываль бегу апынуўся для Крупскай дружыны вельмі багатым на ўзнагароды! Па выніку ўсіх відаў праграмы ў нашых спартсменаў у скарбонцы аказалася 10 прызавых месцаў у асабістым першынстве і каманднае серабро ў эстафетным бегу!

Дзеці ва ўзросце ад 7 да 11 гадоў спаборнічалі на дыстанцыі 500 метраў.

Даў адлік прызавым месцам Хацкевіч Аляксей, навучэнец СШ №3 г. Крупкі, сярод хлапчукоў васьмігадовага ўзросту ён з першых метраў дыстанцыі ўзначаліў забег і ўпэўнена перасёк фінішны створ першым. Аляксей перамагае ўжо другі год запар, летась ён святкаваў перамогу на аналагічнай дыстанцыі сярод хлопцаў 7 гадоў.

На фота: Хацкевіч Аляксей - пераможца на дыстанцыі 500 метраў сярод хлопчыкаў 8 гадоў.

Наступныя ўзнагароды чакалі нас сярод дзяўчынак 9 гадоў, тут апынулася адразу два прызёры: Пятровіч Вікторыя, навучэнка СШ №3 упэўнена перамагла на дыстанцыі, а Грабянцова Ганна з Iгрушкаўскай СШ фінішавала трэцяй.

На фота: Пятровіч Вікторыя (1-е месца), Грабянцова Ганна (3-е месца) - прызёры ў бегу на 500 метраў сярод дзяўчынак 9 гадоў.

У хлопцаў 10-і гадоў ва ўпартай барацьбе другое месца заняў Бахановіч Сяргей, навучэнец СШ №3.

Сярод дзяўчынак 11-і гадоў зноў два прызёры: Сарафіновіч Мілана, навучэнка СШ п. Крупскі, магутным фінішным рыўком літаральна вырвала першае месца ў сваёй напарніцы па камандзе Барадач Аляксандры, навучэнкi Начскай СШ, якая і фінішавала другой.

На фота: Барадач Аляксандра (злева) і Сарафіновіч Мілана з трэнерам Варановічам Уладзімірам Аляксеевічам.

Сярод хлопчыкаў у дадзенай узроставай групе пераможцам апынуўся Малінскі Канстанцін, навучэнец Крупскай раённай гімназіі, які гэтак жа без асаблівых праблем змог абагнаць сваіх супернікаў.

Хацелася б адзначыць хлопцаў, якім крыху не хапіла, каб патрапіць у тройку прызёраў: Харламава Ульяна - 5 месца( 8 гадоў), Цімкін Максім - 4 месца (9 гадоў), Самсонава Сняжана - 4 месца (9 гадоў), Крыгін Назар - 5 месца (8 гадоў).

Далей спаборнічалі больш дарослыя хлопцы ва ўзросце ад 12 да 17 гадоў, якім трэба было пераадолець дыстанцыю 2500 метраў. Сярод удзельнікаў на дадзенай дыстанцыі спаборнічалі пераважна спартсмены-навучэнцы дзіцяча-юнацкіх спартыўных школ, вучылішч алімпійскага рэзерву, цэнтраў алімпійскай падрыхтоўкі па лёгкай атлетыцы Рэспублікі Беларусь.

Сярод дзяўчынак 14-15 гадоў 3 месца заваявала Кандраценка Інэса, навучэнка СШ №3.

На фота: Кандраценка Інэса, бронзавы прызёр на дыстанцыі 2500 метраў сярод дзяўчат 14-15 гадоў.

Сярод юнакоў 14-15 і 16-17 гадоў удзел прымалі выхаванцы Крупскай ДЮСШ, а цяпер навучэнцы Мінскай абласной сярэдняй школы-вучылішча алімпійскага рэзерву Гардзіевіч Данііл і Касцюкевіч Максім. У малодшай узроставай групе ва ўпартай барацьбе за прызавую тройку Данііл стаў бронзавым прызёрам, а ў старэйшай узроставай групе і ў абсалютным першынстве на дадзенай дыстанцыі трэцім фінішаваў Максім.

За крок ад п'едэстала апынулася Грышанкова Анастасія, навучэнка СШ п. Крупскі, якой на фінішы не хапіла 3 секунд да трэцяга месца.

Ну і заключным відам праграмы стала «Дынамічная эстафета» - камандны від спаборніцтваў, які складаецца з 4 жаночых і 4 мужчынскіх этапаў розных узроставых груп пачынаючы ад 10 і заканчваючы 17 гадамі. У спаборніцтвах удзельнічалі каманды ўстаноў адукацыі і спецыялізаваных навучальна-спартыўных устаноў Рэспублікі Беларусь.

Характэрна, што папярэднія два гады каманда Крупскай ДЮСШ выйгравала гэты від спаборніцтваў і везла на Крупшчыну пераходзячы кубак, якім узнагароджвалі пераможцаў. У гэтым годзе не ўсё склалася так гладка, як хацелася б і ў сур'ёзнай канкурэнцыі, а таксама ў сувязі з невялікімі тэхнічнымі праблемамі ў працы судзейскай брыгады, наша каманда заняла 2‑е месца. На першай пазіцыі апынулася каманда Маладзечанскай ДЮСШ №2 - наш адвечны сапернік у бегавых відах праграмы, 3-е месца святкавала каманда Мінскага абласнога кадэцкага вучылішча.

На фота: каманда Крупскай ДЮСШ (злева) – сярэбраны прызёр «Дынамічнай эстафеты» XXXIV Нацыянальнага фестывалю бегу «Языльская дзясятка».

З упэўненасцю можна сказаць, што да пачатку сезона лёгкаатлеты падыходзяць у добрай фізічнай форме, наперадзе яшчэ шмат спаборніцтваў, і мы вельмі спадзяемся, што ў бягучым навучальным годзе яны яшчэ не раз апынуцца на п'едэсталах спаборніцтваў рознага ўзроўню.

Таксама хацелася б выказаць падзяку адміністрацыі, кіроўцам і дыспетчарам філіяла Мінаблаўтатранс «Аўтамабільны парк №16» за прафесійнае аказанне дапамогі ў падвозе і дастаўцы спартсменаў на спартыўныя і спартыўна-масавыя мерапрыемствы.