Уключаць знешнія светлавыя прыборы трэба для прыцягнення ўвагі маленькіх пешаходаў для папярэджання ДТЗ з удзелам дзяцей. Згодна з п. 166.9 ПДР, рабіць гэта неабходна падчас, калі  праводзяцца МУС рэспубліканскія спецыяльныя комплексныя мерапрыемствы па забеспячэнні бяспекі дарожнага руху, якія прадугледжваюць рух транспарту ў светлы час сутак з уключаным блізкім святлом фар або дзённымі хадавымі агнямі (пры іх наяўнасці).

У пачатку навучальнага года супрацоўнікі ДАІ традыцыйна дзяжураць паблізу ўстаноў адукацыі. Гэта робіцца, каб дысцыплінаваць бацькоў-кіроўцаў, якія прывозяць школьнікаў, а таксама дапамагчы навучэнцам бяспечна перайсці праезную частку і ў цэлым забяспечыць бяспеку. Дзяржаўтаінспектары прасочаць за выкананнем аўтааматарамі хуткасных рэжымаў, асабліва побач са школамі. Пад кантролем і правілы праезду пешаходных пераходаў, перавозкі дзяцей-пасажыраў.

Вартавыя парадку таксама правядуць шэраг прафілактычных мерапрыемстваў. У прыватнасці, у працоўных калектывах раскажуць аб прычынах і наступствах дарожных здарэння з удзелам дзяцей, пра тое, як пазбегнуць такіх інцыдэнтаў. Увагу бацькоў звернуць на важнасць падаваць сваім дзецям прыклад на дарозе. Без гэтага засцерагчы рабят сумеснымі намаганнямі міліцыянераў, педагогаў цяжка: высокая верагоднасць таго, што дзіця ўсё ж такі зробіць так, як паступаюць яго мама, тата.

Аб правілах бяспекі ў дварах дзецям варта нагадаць асобна. Неабходна выпрацаваць у іх пэўны алгарытм паводзін. Бардзюр - гэта край і пачатак небяспечнай зоны. Каля яго варта спыніцца і паглядзець па баках, як бы дзіця ні перамяшчалася: крокам, бегам, на самакаце, ровары або роліках. Перасякаць дваравы праезд можна, толькі пераканаўшыся, што машыны не набліжаюцца або вадзіцелі паспелі спыніцца. Бо малога, які раптоўна выбег з-за прыпаркаваных машын, кіроўца можа заўважыць ў апошні момант.